Kontracepsioni emergjent

Gjatë kontracepsionit mund të ndodhin gabime. Ndonjëherë harrojmë të përdorim kontracepsionin. Në këtë rast emergjence, “pilula e emergjencës” ose “spiralja e emergjencës” mund të jetë një opsion për të shmangur shtatzëninë e padëshiruar.

„Pilula e emergjencës“

„Pilula e emergjencës“ është një tabletë hormonale, e cila merret një herë. Ajo mund të vonojë ovulimin (ovulacion) dhe në këtë mënyrë të parandalojë fekondimin e vezës. Për këtë qëllim ajo duhet të merret pas kryerjes së marrëdhënieve seksuale të pambrojtura ose pas një dështimi kontraceptiv, idealisht në të njëjtën ditë ose të nesërmen.

„Pilula e emergjencës“ mund të blihet në farmaci pa recetë. Aty ofrohen edhe konsultime. Natën dhe gjatë fundjavës mund të shkoni në shërbimin e urgjencës së farmacisë ose në klinikën ambulatore të spitalit më të afërt.

Informacione të tjera të rëndësishme

„Pilula e emergjencës“ duhet të merret sa më shpejt që të jetë e mundur pas marrëdhënies seksuale të pambrojtur, mundësisht brenda 12 orëve. Sa më shumë kohë të kalojë, aq më i madh është rreziku që të ndodhë shtatzënia. Pesë ditë pas marrëdhënies seksuale të pambrojtur, është tepër vonë për “pilulën e emergjencës”.
Nëse menstruacionet (gjakderdhja menstruale) ndodhin afërsisht në ditën e pritshme dhe me intensitet normal, kjo është një shenjë që nuk jeni shtatzënë. Nëse nuk jeni të sigurt, është më mirë të bëni një test shtatzënie.
Nëse tashmë jeni shtatzënë, “pilula e emergjencës” nuk do ta ndërpresë këtë shtatzëni. Nuk mendohet se “pilula e emergjencës” mund të shkaktojë ndonjë dëmtim të embrionit.
Disa medikamente mund të kufizojnë efektin e “pilulës së emergjencës”. Nëse merrni rregullisht medikamente ose i keni marrë ato së fundmi, konsultohuni në lidhje me këtë në farmaci ose me një mjeke ose mjek.
Në rast mbipeshe të tepruar, “pilula e emergjencës” mund të mos funksionojë mirë.
Tek disa gra shkaktohen dhimbje koke, të përziera dhe dhimbje barku nga “pilula e emergjencës”. Mund të ndodhin edhe gjakderdhje ndërmenstruale, ndjeshmëri të gjirit dhe të vjella. Disa gra ndjejnë marrje mendsh ose trullosje pas marrjes së saj, dhe si pasojë e kësaj ato nuk duhet të ngasin makinën.

Kostot „Pilula e emergjencës“

„Pilula e emergjencës“ kushton nga 16 deri në 30 euro (ose pak më shumë).

Për gratë me sigurim shëndetësor ligjor, kostot e “pilulës së emergjencës” mbulohen deri në ditëlindjen e tyre të 22-të, nëse ato kanë marrë një recetë nga mjeku, para blerjes së saj.

Në disa qytete, kostot e kontraceptivëve mbulohen nëse një grua ka pak para. Ju mund të kontrolloni databazën, për të parë nëse kostot e kontraceptivëve mbulohen në qytetin tuaj. Për këtë, përdorni filtrin e kërkimit “Mbulimi i kostove".

„Spiralja e emergjencës“

„Spiralja e emergjencës“ është një spirale bakri, e cila vendoset në mitër. Atë ju mund ta përdorni si “kontracepsion emergjent” nëse kanë kaluar pak më shumë se pesë ditë nga dështimi i kontraceptivëve dhe që në këto momente dëshironi të përdorni spiralen e bakrit si mënyrë kontracepsioni.

Nëse, pas dështimit të kontraceptivëve, fekondimi tashmë ka ndodhur, spiralja mund të parandalojë implantimin e kësaj veze të fekonduar në mitër. Sapo veza të jetë implantuar, ju jeni shtatzënë dhe më pas është tepër vonë për “spiralen e emergjencës”.

„Spiralja e emergjencës“ mund të vendoset vetëm nga një mjeke ose mjek. Në çdo rast, do të kontrollohet paraprakisht nëse jeni tashmë shtatzënë.

Kostot „Spiralja e emergjencës“

„Spiralja e emergjencës“ kushton në varësi të modelit, nga 120 deri në 300 euro. Çmimi mbulon konsultimin, kontrollin dhe vendosjen e spirales. Krahas kësaj, kontrolli i rregullt mjekësor i rekomanduar kushton 20 deri në 50 euro.

Nëse vajzat e reja janë të siguruara tek një agjensi e sigurimit shëndetësor ligjor, kostot e spirales mund të mbulohen plotësisht ose pjesërisht deri në ditëlindjen e tyre të 22-të. Pyesni në lidhje me këtë mjeken ose mjekun tuaj.

Në disa qytete, kostot e kontraceptivëve mbulohen nëse një grua ka pak para. Ju mund të kontrolloni databazën, për të parë nëse kostot e kontraceptivëve mbulohen në qytetin tuaj. Për këtë, përdorni filtrin e kërkimit "Mbulimi i kostove".